Карабаш сусаклагычының су үткәрү каналына ана поши эләккән һәм мөстәкыйль рәвештә чыга алмаган . Хайванны 4.00 сәгатьтә Бөгелмә аучылык хуҗалыгы аучысы Илфат Рәхимов тапкан. Бу хакта Биоресурслар буенча дәүләт комитеты матбугат хезмәте хәбәр итә.

Илфат Рәхимов аучылык һәм балыкчыларның төбәк җитәкчелегенә, Бөгелмә районы буенча аучылыкка, җирле үзидарә органнарына, Гадәттән тыш хәлләр министрлыгына, су объекты милекчеләренә хәбәр иткән.

Килеп җиткән кешеләр зыян күргән хайванны каналдан алып, иреккә, кыргый табигатькә җибәргән. Хәзер аның гомеренә һәм сәламәтлегенә берни дә янамый.

Мондый хәлләр турында Татарстан Биоресурслар буенча дәүләт комитетына 8 (843) 211-66-94 телефоны буенча хәбәр итәргә мөмкин.